Հայ Առաքելական եկեղեցին Քրիստոսի Հարության երրորդ կիրակին անվանում է Աշխարհամատրան կամ Կանաչ կիրակի: Այն խորհրդանշում է բնության զարթոնքը: Վայոց ձորում այս տոնն առանձնահատուկ է նշվում, քանի որ այն համարվում է նաև Նորավանքի ուխտի օր:
Այդ օրը Նորավանքի վանական համալիր են այցելել հարյուրավոր ուխտավորներ, հայ և օտարազգի զբոսաշրջիկներ` մասնակցել հոգևոր դասի մատուցած պատարագին:
Տոնական միջոցառմանը ելույթ են ունեցել մարզի երգի և պարի համույթները:
«Արփի» բնապատմական արգելոցի նախաձեռնությամբ էլ կազմակերպվել է «Վայոց ձորի փոքրիկ նկարիչներ» խորագրով Եղեգնաձորի գեղարվեստի դպրոցի սաների նկարների ցուցադրություն: Նրանք նկարել են Նորավանքը` իր ողջ հմայքով ու հրաշալի բնությամբ: Պատանիների աշխատանքից ներշնչվելով` նրանց են միացել նաև օտարազգի հասակակիցները:
Այցելուների գովեստի ու ոգեշնչող խոսքերը պատանի ստեղծագործողների համար լավագույն գնահատականն են եղել:
