«Պատմական միջավայրի պահպանության ծառայություն» ՊՈԱԿ-ի ղեկավարությունը աշխատանքային այցով Գեղարքունիքի մարզում էր: ՊՈԱԿ-ի տնօրեն Արա Թարվերդյանը և տնօրենի տեղակալ Կարեն Փահլևանյանը Գեղարքունիքի մարզպետ Գնել Սանոսյանի հետ հանդիպմանը ներկայացրել են կազմակերպության գործառույթները, իրավասությունները ու մարզային ծառայության աշխատանքի ընթացքում ծագող հիմնական խնդիրները:
Ա. Թարվերդյանի խոսքով մարզում 4000-ից ավելի հուշարձան կա և շատ համայնքների ղեկավարներ իրակզեկված չեն ինչ է հուշարձանը, դրա պահպանական գոտին: Հաճախ հողհատկացումների ընթացքում խնդիրներ են առաջանում: Այդ հանգամանքն էլ նկատի ունենալով ՊՈԱԿ-ի ղեկավարությունը նախատեսում է առաջիկայում հանրապետության բոլոր համայնանքերի ղեկավարներին տրամադրել օրենսդրական բազա ներառող խտասկավառակներ և մարզի հուշարձանների մասին պատմող ծալաթերթեր /բուկլետներ/:
Ա. Թավերդյանը Գեղարքունիքի մարզպետին խնդրել է անձնական վերահսկողության տակ պահել համայնքների ղեկավարների ու հուշարձանների պահապանների գործակցությունը, քանի որ դրանից կշահի միայն հուշարձանը:
«Կարևորում եմ մշակութային արժեքների պահպանությունը և ողջունում ձեր աշխատանքը: Մարզը իսկապես հարուստ է մշակութային ժառանգությամբ: Կաշխատենք միասին և կանենք հնարավորը, որ համայնքների ղեկավարների հետ փոխգործակցված աշխատանքի արդյունքում հաջողություններ արձանագրենք», – իր խոսքում ասել է մարզպետ Գնել Սանոսյանը:
Առաջիկայում մարզխորհրդի նիստ կգումարվի, որին կմասնակցեն 57 համայքների ղեկավարներ: Մարզպետ Սանոսյանն առաջարկել է ներկա գտնվել նիստին ու խնդիրները քննարկել տեղում:
Գեղարքունիքի մարզպետը նաև նշել է, որ համապատասխան շրջաբերականներ կուղարկվեն համայնքների ղեկավարներին:
Քննարկվել է նաև զբոսաշրջության զարգացման ուղղությամբ աշխատանքներ իրականացնելու հարցը:
ՊՈԱԿ-ի ղեկավարությունը նաև աշխատանքային խորհրդակցություն է անցկացրել մարզային ծառայությունում:
«Ձեր առջև աշխատանքի նոր պահանջներ են դրվում: Օրենսդրությանը եւ ձեր պահպանության տակ գտնվող հուշարձանների մասին տեղեկատվությանը տիրապետելը պետք է բարձր մակարդակի վրա լինի: Առաջիկայում մարզային ծառայությունը տեխնիկապես կվերազինվի և անօդաչու սարքի /դռոն/-ի միջոցով հնարավորություն կունենաք հուշարձանների վիճակն արձանագրել նաև վերևից», -մարզային ծառայությունում անցկացված խորհրդակցության ժամանակ ասել է «Պատմական միջավայրի պահպանության ծառայություն» ՊՈԱԿ-ի տնօրեն Արա Թարվերդյանը:
ՊՈԱԿ-ի տնօրենը կոչ է արել հուշարձանների պահապաններին մշտական բացատրական աշխատանքներ իրականացնել հասարակության շրջանում՝ հնարավոր իրավախախտումներից խուսախելու համար: Նա անդրադարձել է նաև առանձին հուշարձանների, մասնավորապես՝ Լճաշենի ամրոց քաղաքատեղին արգելոց-թանգարան դարձնելու անհրաժեշտությանը և այդ ուղղությամբ իրականացվելիք աշխատանքներին:
Հուշարձանների պահպանության համար պատասխանատվության իրենց բաժինն ունեն նաև համայնքների ղեկավարները: Այդ համատեքստում էլ խոսելով համայնքների ղեկավարների հետ գործակցության արդյունավետության մասին Ա. Թարվերդյանն ասել է. «ձեր իրավական գիտելիքները պետք է այնքան բարձր լինեն, որ գյուղապետը զգույշ լինի խոսելիս ու հարգանքով վերաբերվի ձեր աշխատանքին»:
Կազմակերպության ղեկավարը նաև տեղեկություն է փոխանցել մարզային ծառայության աշխատակիցներին Գեղարքունիքի մարզպետ Գնել Սանոսյանի հետ ունեցած հանդիպումից:
