«Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի մասնաճյուղ «Արփի» բնապատմական արգելոցում առաջիկայում նոր ծրագրեր կիրականացվեն։ Դրանք միտված են նախ եւ առաջ հուշարձանի պահպանությանը ու արգելոցի զարգացմանը։
ՊՈԱԿ-ի տնօրեն Արա Թարվերդյանը եւ տնօրենի տեղակալ Արկադի Օսիպովը այդ համատեքստում շահագրգիռ քննարկում են ունեցել «Կովկասի բնության հիմնադրամ»-ի հայաստանյան ներկայացուցչության տնօրեն Արման Վերմիշյանի, «Բնության համաշխարհային հիմնադրամ» -ի հայաստանյան մասնաճյուղի ղեկավար Կարեն Մանվելյանի եւ «Արփի» բնապատմական հիմնադրամի խորհրդի նախագահ Արսեն Մաթեւոսյանի հետ։
Վերջիններս ներկայացրել են իրենց գործունեությունը եւ հնարավոր գործակցության ասպեկտները։
ՊՈԱԿ-ի տնօրեն Արա Թարվերդյանի խոսքով «Արփի»-ին մարզի նշանակալի արգելոցն է` իր հուշարձաններով ու քարանձավներով։ Գաղտնիք չէ, որ արգելոցը մշտապես շատ այցելուներ է ունենում։ Համավարակով պայմանավորված օտարերկրացիներ անցած ամիսների ընթացքում գրեթե չեկան, փոխարենը` ներգնա տուրիզմն է ակտիվացել։
«Այցելուների հոսքն արդեն որոշակի աշխատանքների առավել արդյունավետ կազմակերպում է ենթադրում, նոր ու հետաքրքիր մոտեցումներով։ Հենց այդ համատեքստում էլ ՊՈԱԿ-ը նախատեսում է գործակցել շահագրգիռ կառույցների հետ», -իր խոսքում ասել է Արա Թարվերդյանը։
Նա ներկայացրել է կազմակերպության լիազորությունները` հուշարձանի պահպանություն, ուսումնասիրություն, հանրահռչակում եւ օգտագործում։ ՊՈԱԿ-ի տնօրենը շեշտը դրել է կրթական, գիտահետազոտական ծրագրերի իրականացման, հանրահռչակման մասով էլ` բազմաբովանդակ մշակութային միջոցառումների անցկացման վրա:
Ի դեպ, ՊՈԱԿ-ի և վերոնշյալ կազմակերպությունների փոխգործակցությանը վերաբերող բոլոր գաղափարները, առաջարկությունները կմշակվեն եւ հետագա հանդիպմանը կներկայացվեն հայեցակարգի տեսքով։
Նախատեսվում է նաև առաջիկայում համագործակցության մասին հուշագիր ստորագրել։
