Իտալացի մեծագույն կոմպոզիտորներ Վիվալդիի, Սկարլատիի, Պերգոլեզիի, Պիչինիի օպերաների բացառիկ նոտաները կիրակի երեկոյան լցրել էին «Զվարթնոց» պատմամշակութային արգելոց-թանգարանը։ ՀՀ ԿԳՄՍ նախարարության աջակցությամբ՝ «Սանկտ Պետերբուրգի պալատներ» միջզգային երաժշտական փառատոնը «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի հետ գործակցությամբ Զվարթնոցի տաճարում իրականացրել է «Տիգրան Մեծի մետամորֆոզները» խորագրով միջազգային երաժշտական փառատոն՝ նվիրված արքայից արքա Տիգրան Մեծին։
Մարիա Սաֆարյանց Ս․Պետերբուրգի պալատներ միջազգային երաժշտական փառատոնի գեղարվեստական ղեկավար, ՌԴ վաստակավոր արտիստ
Ես միշտ ասում եմ, որ մշակույթը նման է ոսկու փոշու, որը հեշտ է տարածել, բայց դժվար է կուտակել: Հայաստանը հագեցած է դրանով, այս երկրի հողն աշխարհին տվել է երգիչների, երաժիշտների և կոմպոզիտորների մի ամբողջ սերունդ։ Ուստի մեզ համար այս փառատոնը Հայաստանում անցկացնելը մեծ իրադարձություն է և մեծ պատիվ։ Մենք անհամբեր սպասում ենք դասական երաժշտության սիրահարների հետ մեր հանդիպմանը, և լիահույս ենք, որ հայ հանդիսատեսը կսիրի մեր փառատոնը և ժամանակի ընթացքում այն կդառնա ավանդական։
Անվանի հայ ջութակահարի հետ Զվարթնոցում բեմ են բարձրացել համաշխարհային հռչակ ունեցող օպերային աստղեր Իտալիայից, Հայաստանից և Ռուսաստանից։
Փառատոնը կավարտվի հունիսի 23-ին, Արամ Խաչատրյանի անվան համերգասրահում «Հաղթողների գալա» համերգով, որի ընթացքում կհնչեն կինոերաժշտական աշխարհի գլուխգործոցներ՝ միջազգային հեղինակավոր մրցույթների դափնեկիրների կատարմամբ։
