ՄՌԹԲԻ ՁՈՐԻ ԿԻԿԼՈՊՅԱՆ ԱՄՐՈՑ

ՄՌԹԲԻ ՁՈՐԻ ԿԻԿԼՈՊՅԱՆ ԱՄՐՈՑ

ՄՌԹԲԻ ՁՈՐԻ ԿԻԿԼՈՊՅԱՆ ԱՄՐՈՑ
Գեղարքունիքի մարզ
ք. Գավառ
պետ. ցուցիչ` 4.1.9

 

Գտնվում է Գավառ քաղաքի Արծվաքար թաղամասում, Մարտունի տանող ճանապարհի ձախ կողմում, Կարմիր գյուղից 50 մ հյուսիս: Ամրոցը պատկանում է մ.թ.ա. III-I հազարամյակներին: Զբաղեցնում է կես հեկտարից քիչ ավելի տարածություն: Հարավային և արևելյան կողմերից ամրոցը պաշտպանված է ժայռերով, իսկ հյուսիսային և արևելյան կողմերից՝ կիկլոպյան պարիսպներով, որոնց վրա մնացել են չորս քարաբուրգերի մնացորդներ: Պարիսպների հիմքերի լայնությունը 3,5 մետր է, իսկ աշտարակների հիմքերը, որոնք շատ վատ են պահպանվել, հատակագծում ունեն 4×4 մետր չափեր: Ամրոցի հարավարևմտյան կողմում հայտնաբերվել է մեկ մետր լայնություն և ութ մետր երկարություն ունեցող ստորգետնյա գետնուղի, որը ժայռաքարերի միջով անցնում է դեպի դիմացի ձորը: Հուշարձանի հարավային և արևմտյան կողմերում նկատելի են բազմաթիվ կացարանների ու պաշտպանական շինությունների հետքեր:
Մռթբի ամրոցը 1930-ական թվականներին չափագրել են Բ. Պիոտրովսկին և Լ. Գյուզալյանը: Ամրոցի շրջակայքում կա նաև մ.թ.ա. II հազարամյակի դամբարանադաշտ:

Հիմնական գրականություն

Գ. Միքայելյան, Սևանի ավազանի կիկլոպյան ամրոցները, Երևան, 1968: