Ապրիլի 18-ը հուշարձանների եւ տեսարժան վայրերի միջազգային օրն է։ Այս համատեքստում կարեւոր են հուշարձանների պահպանության ուղղությամբ Հայաստանում իրականացվող միջոցառումները։ Դրանց պահպանության խնդիրն ամենօրյա է ու արդիական։ Մայրաքաղաքի ու մարզերի հանրակրթական շուրջ 370 դպրոցների 4700-ից ավելի աշակերտներ ու պաշտպանության նախարարության զորամասերի ժամկետային զինծառայողներ ապրիլի 18-ին 500 հուշարձան մաքրեցին, բարեկարգեցին՝ հարակից տարածքները։
Ռազմահայրենասիրական դաստիարակության համատեքստում անցկացված այս նախաձեռնությունը՝ բանակ- կրթություն-մշակույթ համագործակցության շրջանակներում էր։ Գործակցության մասին հրամանն ավելի վաղ ստորագրել էին երեք գերատեսչությունների ղեկավարները։ Աշխատանքների ավարտին դպրոցականներին ու զինծառայողներին ներկայացվել է օրվա խորհուրդը, հուշարձանների պատմությունը։
