Հուշարձանների պահպանության ոլորտում առկա որոշ խնդիրներ կանխելու ու հասարակության իրավագիտակցության բարձրացման հարցում շատ կարևոր է համայնքների ղեկավարների դերը:
Այս նկատառումով էլ՝ <<Պատմամշակութային արգելոց-թանգարանների և պատմական միջավայրի պահպանության ծառայություն>> ՊՈԱԿ-ի ղեկավարությունը՝ տնօրեն Արա Թավերդյանը և տնօրենի տեղակալ Խորեն Գրիգորյանը աշխատանքային հանդիպումներ են ունեցել մարզպետների հետ՝ ներկայացնելով կազմակերպության գործունեությունը, տվյալ մարզում հուշարձանների թիվը, նրանց պահպանությանն առնչվող խնդիրներն ու տեղում քննարկել մտահոգող հարցերը:
Հերթականը՝ Արմավիրի մարզպետ Համբարձում Մաթևոսյանի և Կոտայքի մարզպետ Ռոմանոս Պետրոսյանի հետ էր:
<Հաճախ խնդիրներ են առաջանում հողահատկացումների ընթացքում կամ ապօրինի թաղումներ են իրականացվում հուշարձանի կարգավիճակ ունեցող գերեզմանոցների տարածքներում: Այդօրինակ դեպքերը բացառելու համար ՊՈԱԿ-ի տնօրինությունը համայնքների ղեկավարներին կտրմադրի օրենսդրական բազա ընդգրկող տեղեկատվական նյութ և մարզի հուշարձանների մասին պատմող ծալաթերթիկներ >- Արմավիրի մարզպետի հետ հանդիպման ընթացքում ասել է ՊՈԱԿ-ի տնօրեն Արա Թարվերդյանը:
Մայրաքաղաքի Երևանից շատ քիչ հեռավորության վրա գտնվող երկու հրաշալի ու պատմական կարևոր նշանակություն ունեցող հուշարձանները՝ <<Զվարթնոց>> պատմամշակութային արգելոց-թանգարանի ու <<Մեծամոր>> պատմահնագիտական արգելոց-թանգարանի կյանքը պետք է առավել ակտիվացնել՝ օտարեկրացի այցելուներին հոսքը ուղղելով վերոնշյալ հուշարձանների տարածքներ: Մայր Աթոռ սուրբ Էջմիածին ու Սարդարապատի հուշահամալիր երթուղին կարելի է ընդլայնել՝ ներառելով <<Մեծամոր>>-ը ու <<Զվարթնոց>>-ը: ՊՈԱԿ-ի տնօրենի խոսքով երկու արգելոց-թանգարաններն էլ իրենց պատմաճարտարապետական նշանակությամբ բացառիկ են և զբոսաշրջիկների վրա մեծ տպավորություն կթողնեն:
Խոսելով <<Մեծամոր>> արգելոց-թանգարանի հեռանկարային զարգացման ծրագրի մասին Արա Թարվերդյանն ասել է, որ հետագայում այն կարող է դառնալ գիտակրթական լուրջ կենտրոն: ՊՈԱԿ-ի տնօրենն անդրադարձել է նաև Արմավիր հնավայրին: Նրա համոզմամբ, եթե հետագայում հուշարձանը արգելոցի կարգավիճակ ստանա՝ համատեղ ուժերով մի շարք ծրագրեր կյանքի կկոչվեն՝ ապահովելով հուշարձանի գրավչութունը այցելուների համար:
Արմավիրի մարզպետ Համբարձում Մաթևոսյանը ևս կարևորելով մշակութային ժառանգության պահպանությունը, նաև՝ մարզում մշակութային կյանքի ակտիվացումը, որպես առաջնային հարց նշել է դեպի <<Մեծամոր>> արգելոց-թանգարան տանող ճանապարհի վերնորոգումը: Մարզպետի փոխանցմամբ, առաջիկայում աշխատանքները կսկսվեն և հարցն իր անմիջական հսկողության տակ է:
Կոտայքի մարզպետ Ռոմանոս Պետրոսյանի հետ հանդիպման առանցքում էլ հուշարձանների պահպանության հարցում համայնքների ղեկավարների հետ աշխատանքի արդյունավետության բարձրացումն է եղել: ՊՈԱԿ-ի տնօրենը խոսել է զբոսաշրջիկների պակաս չունեցող <<Գառնի>> պատմսմշակութային արգելոց-թանգարանի ու նույն մարզում գտնվող ու վերջերս արգելոցի կարգավիճակ ստացած <<Բջնի ամրոց>> արգելոցի մասին: Յուրօրինակ ու շքեղ այս հուշարձանը այցելուների համար գրավիչ դարձնելու նկատառումով ՊՈԱԿ-ի տնօրենի խոսքով առաջիկայում մի շարք ծրագրեր կյանքի կկոչվեն, բայց ամենակարևորը՝ կրկին ճանապարհի նորոգման խնդիրն է:
Արա Թարվերդյանի խոսքով <<Բջնի ամրոց>> արգելոցը տարածքում ի թիվս այլ նախաձեռնությունների հետագայում նաև պեղումներ կիրականացվեն: Հնագիտական արշավախմբի աշխատանքներին <<մասնակից>> լինելը ու այդ աշխատանքներին տեղում հետևելը իսկապես կհետաքրքրի այցելուներին: Արա Թարվերդյանի համոզմամբ զբոսաշրջիկների հոսքը հուշարձանի տարածք նաև աշխուժություն կմտցնի գյուղի կյանքում:
Մարզպետ Ռոմանոս Պետրոսյանն իր հերթին պատրաստակամություն է հայտնել հետագա գործակցության համար, խոսել՝ համայնքային տուրիզմի զարգացնելու ծրագրերի մասին:
