Ապրիլի 18-ը Հուշարձանների և տեսարժան վայրերի միջազգային օրն է: Հուշարձանների և տեսարժան վայրերի միջազգային խորհրդի /ԻԿՕՄՕՍ/ առաջարկությամբ՝ ՅՈՒՆԵՍԿՕ-ն այն նշում է արդեն 35 տարի: Մեր երկիրը համաշխարհային ժառանգության կոնվենցիան վավերացրել է 1993 թ.:
Հուշարձանների և տեսարժան վայրերի միջազգային օրը ոլորտի պատասխանատուների մասնագիտական տոնն է: Մեր դարավոր մշակույթի լուռ վկաների անխաթար պահպանությունը վստահված է «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ին: Ձեզնից յուրաքանչյուրը մեծ նվիրումով ու պատասխանատվությամբ է իրականացնում այդ կարևոր գործը:
Մեր ոլորտի նվիրյալներին է վստահված ոչ միայն հուշարձանների պահպանությունը, այլև` ուսումնասիրումը, հանրահռչակումն ու օգտագործումը: ՊՈԱԿ-ի գիտնականների ուսումնասիրությունների, հրատարակությունների և հնագիտական արշավախմբերի կողմից իրականացվող աշխատանքների շնորհիվ պարբերաբար հանրությանն են ներկայացվում մշակութային ժառանգության դեռևս չբացահայտված գաղտնիքները:
«Պահպանության ծառայություն» ՊՈԱԿ-ի տնօրենությունը շնորհավորում է գործընկերներին մասնագիտական տոնի առթիվ` մաղթում հաջողություններ ու նորանոր ձեռքբերումներ:
ՊՈԱԿ-ի տնօրեն Արա Թարվերդյան