«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ում ավարտվել են 2024 թ․ տարեկան հաշվետվությունները։
Հաշվետվություններն ընդունել են «Պահպանության ծառայություն» ՊՈԱԿ-ի տնօրենի տեղակալներ Հայկ Դանիելյանը և Հայկ Նավասարդյանը։
2024 թ․ ամփոփիչ եռօրյա հաշվետվությունների առաջին օրը անցնող տարվա աշխատանքներն են ներկայացրել «Պահպանության ծառայություն» ՊՈԱԿ-ի Պատմական միջավայրի պահպանության մարզային ծառայության ղեկավարները։
Հայաստանի Հանրապետության մարզերում տարվա ընթացքում /Արարատ, Լոռի, Կոտայք, Սյունիք, Վայոց ձոր/ հողի շերտից մաքրվել, կանգնեցվել է 57 խաչքար։
Տարվա ընթացքում ՀՀ մարզերում արձանագրվել է իրավախախտման 90 դեպք։ Իրավախախտումների վերաբերյալ տեղեկատվություն է տրամադրվել ՀՀ ԿԳՄՍ նախարարություն և իրավապահ մարմիններին։
Հաշվետվությունների երկրոդ օրը ամփոփելով 2024 թ․ արդյունքները պատմական միջավայրի զարգացման ծրագրերի, գիտացուցադրական և գիտահետազոտական աշխատանքների գծով փոխտնօրեն Հայկ Նավասարդյանը նշել է, որ այս տարում շեշտը դրվել էր ավելի շատ գիտակրթական ծրագրերի վրա, որը շարունակական զարգացումն է ունենալու 2025 թ․ ներդրվելու են նոր կրթական ծրագեր, յուրաքանչյուր արգելոցի համար մշակվել է զարգացման նոր ծրագիր։
Հաշվետվության վերջին՝ երրորդ օրը, անցնող տարին ամփոփել են «Պահպանության ծառայություն» ՊՈԱԿ-ի Ֆոնդերի, Հուշարձանների պապանության, Թանգարանային առարկաների վերականգնման լաբորատորիայի, Գիտահետազոտական, Իրավաբանական, Մարքեթինգի և զարգացման ծրագրերի, Ցուցադրությունների և միջոցառումների կազմակերպման, ՊՈԱԿ-ի վարչական մասնաշենքի անվտանգության ՔՊ և ԱԻ բաժինները։
Ֆոնդերի հաշվառման և պահպանման բաժնի հիմնական հավաքածուն համալրվել է 1440 միավոր առարկայով։
Հայկական գանձարան տեղեկատվական շտեմարանը լրացվել է 17225 միավոր թանգարանային առարկայի վերաբերյալ տեղեկույթով։
Խմբագրվել և հաստատվել է «Մշակութային արժեքների էլեկտրոնային տեղեկատվական շտեմարանում» մուտքագրված 14822 թանգարանային առարկայի տվյալ։
Կազմվել է 428 գիտական վկայագիր:
Տպագրվել է «Պատկեր և պատում․ XX դարի Սյունիքը Գուրոսի լուսանկարներում» գիրքը։
2024 թ. ընթացքում նորոգվել է 41 գիրք։
2024 թ․ պեղումներ են իրականացվել Վայոց ձորի մարզի Հորս գյուղում գտնվող իշխան Չեսար Օրբելյանի 14-րդ դ․ պալատի և կից եկեղեցու տարածքում, Սյունիքի մարզի Քաջարան համայնքում գտնվող միջնադարյան Բաղաբերդ ամրոցում, Արմավիրի մարզի Տարոնիկ համայնքի «Մեծամոր» հնավայրում, Գեղարքունիքի մարզի Գավառ համայնքի Բերդկունք ամրոցում։
Հաշվետու ժամանակահատվածում Հուշարձանների պահպանության բաժին է մուտքագրվել 989 գրություն, որոնց մեջ ներառված տեղեկատվությունն ուսումնասիրվել և համակարգվել է, կազմվել են համապատասխան գրություններ։
2024 թ․ ընթացքում իրականացվել են՝ «Զվարթնոց» պատմամշակութային արգելոց-թանգարանում «Թորամանյան 160» ցուցահանդեսը, Թանգարանների միջազգային օրվան նվիրված Գյումրիում՝ «Դիլիջանյան գույներ», «Մեծամոր» պատմահնագիտական արգելոց-թանգարանում՝ «Մեծամորյան․․․Շքեղությունը ժամանակի միջով», Եվրոպական հնագիտական օրերի շրջանակում՝ «Մի վիշապի պատմություն» ժամանակավոր ցուցահանդեսները։
Թանգարանային առարկաների վերականգնման լաբորատորիայում մաքրվել և վերականգնվել է թվով 323 առարկա։
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի մարքեթինգի և զարգացման ծրագրերի բաժինը 2024 թվականի ընթացքում, համաձայն կազմակերպության կանոնադրության, իրականացրել է «Պահպանության ծառայություն» ՊՈԱԿ-ի հոգածության ներքո գտնվող պատմական, հնագիտական, ճարտարապետական անշարժ հուշարձանախմբերի և բնապատմական միջավայրի ուսումնասիրում և հանրահռչակում:
Պաշտոնական կայքէջի (եռալեզու) և ֆեյսբուքյան էջի համար պատրաստվել է ընդհանուր թվով 300 նյութ (լուրեր, հոդվածներ)։
Ամփոփելով անցնող տարին հանձնաժողովի նախագահ, ՊՈԱԿ-ի տնօրենի տեղակալ Հայկ Դանիելյանը նշել է, որ ենթակա ստորաբաժանումների ղեկավարներին հանձնարականները կտրվեն գրավոր:
