«Եվրոպական ժառանգության օրեր» ծրագրի շրջանակում «Արփի» արգելոցի նախաձեռնությամբ Արենիի մշակույթի տանը կազմակերպվել է «Կիսվելու արվեստ․ազգային պարարվեստ» խորագրով միջոցառում-հանդիպում։
Միջոցառմանը ներկա էին Վայոց ձորի ՊՄՊ մարզային ծառայության, Արենիի համայնքապետարանի աշխատակիցներ, «Արփա» ազգագրական երգի, պարի համույթի վետերանները, «Արենի» ազգագրական պարի համույթի սաները, համայնքի բնակիչներ։
Բացման խոսքով հանդես է եկել Շաքե Ղարախանյանը, ներկայացրել օրվա խորհուրդը և հանդիպման նպատակը։ Միջոցառման ընթացքում պատանիները հետաքրքիր տեղեկություններ են ներկայացրել հայկական ազգագրական պարարվեստի մասին և անդրադարձել հայպահպանման գործում պարարվեստի կարևոր դերակատարմանը։
Պարարվեստի ավագ սերնդի ներկայացուցիչները պատասխանել են իրենց ուղղված պատանիների հարցերին, կիսվեցին հիշողություններով, հետաքրքրությամբ հետևել երիտասարդների պարային կատարումներին։ Վերջում վարպետության դաս վետերաններից՝ կրտսեր սաներին սովորեցրել են Արենիի քոչարին։
Միջոցառման ավարտին ներկաներին ողջունել է Վայոց ձորի ՊՄՊ մարզային ծառայության պետ Մելանյա Դովլաթյանը, հիշել «Արփա» ազգագրական երգի ու պարի համույթի երբեմնի կատարումները և երիտասարդներին հորդորել աչալուրջ լինել ազգային մշակույթի պահպանման գործում։
Միջոցառման ավարտին «Արփի» արգելոցի վարիչի պաշտոնակատար Արսեն Մարտիրոսյանը հուշանվերներ է հանձնել պատվավոր հյուրերին։
«Եվրոպական ժառանգության օրեր»-ին անդրադարձել են նաև ‹‹Զվարթնոց» պատմամշակութային արգելոց-թանգարանում։ Կազմակերպվել է ‹‹Պատմամշակութային ժառանգության գիտակներ» խորագիրը կրող մրցույթ-վիկտորինա: Միջոցառմանը մասնակցել են նաև օտարերկրացի զբոսաշրջիկներ: Ներկաներին ներկայացվել է որևէ երկրի ճարտարապետական հայտնի գլուխգործոցի նկարագրություն, նրանք փորձե լ են գուշակել, թե որ հուշարձանի մասին է խոսքը: Մրցույթ-վիկտորինային ակտիվորեն մասնակցած այցելուներն արժանացել են հուշանվերների:
