Նաթանիել Էրբ-Սատուլլոն առաջիկա մեկ շաբաթվա ընթացքում իր հայ գործընկերոջ՝ «Պահպանության ծառայություն» ՊՈԱԿ-ի գիտնական-քարտուղար Աշոտ Փիլիպոսյանի հետ կաշխատի կազմակերպության մասնաճյուղ՝ «Մեծամոր» պատմահնագիտական արգելոց-թանգարանում: Նա կուսումնասիրի Մեծամորի հնավայրի տարածքից հայտնաբերված ուշ բրոնզի ու երկաթե դարաշրջաններով թվագրվող խարամները: Մետաղի լաբորատոր ուսումնասիրությունը Ն. Էրբ-Սատուլլոյի նեղ մասնագիտացումն է: Հնագիտական նյութն ավելի խորը ուսումնասիրելու համար, հետագայում դրանք կուղարկվեն Օքսֆորդի համալսարանի հետազոտական լաբորատորիա:
«Պահպանության ծառայություն» ՊՈԱԿ-ի տնօրեն Արա Թարվերդյանի հետ այսօր կայացած հանդիպմանը քննարկվել է գործակցության ու դրա հետագա զարգացմանն առնչվող հարցեր: Օտարերկրացի հյուրը ՊՈԱԿ-ի տնօրենին ներկայացրել է իր գիտական գործունեության ոլորտը, իրականացվելիք աշխատանքների ծավալը, շրջանակը:
Արա Թարվերդյանն էլ խոսել է կազմակերպության կառուցվածքի, գործառույթների և իրավասությունների մասին՝ նշելով, որ ՊՈԱԿ-ի պահպանության տակ է գտնվում պետական սեփականություն համարվող և օտարման ոչ ենթակա 19. 000-ից ավելի հուշարձան:
Անդրադառնալով Մեծամորի հնավայրին, Ա. Թարվերդյանը շեշտել է հուշարձանի բացառիկությունը, նաև նշել, որ պեղումները շարունակական են: Կազմակերպության ղեկավարի խոսքով հայտնաբերված նյութը գիտական աշխարհի համար նոր բացահայտումներ անելու և Մեծամորի՝ ժամանակի մետաղագործական լուրջ կենտրոն լինելու փաստն աշխարհին նորովի ներկայացնելու հնարավորություն կտա:
Նշենք, որ հայ-լեհական արշավախումբը Մեծամորում պեղումները կսկսի առաջիկայում: Արշավախմբի համաղեկավար, պատմական գիտությունների դոկտոր-պրոֆեսոր Աշոտ Փիլիպոսյանի խոսքով չի բացառվում, որ Ն. Էրբ-Սատուլլոյի այս տարվա լաբորատոր աշխատանքի արդյունքը՝ հնագիտական նյութը /մետաղը/ տեղ գտնի թանգարանի հաջորդ տարվա ժամանակավոր ցուցադրությունում:
