1983 թվականից ապրիլի 18-ը նշվում է որպես Հուշարձանների և տեսարժան վայրերի միջազգային օր:
Մասնագիտական տոնի առթիվ շնորհավորում եմ ոլորտի ներկայացուցիչներին, ինչպես նաև բոլոր ՀՀ քաղաքացիներին:
Պատմամշակութային հուշարձանները մեր պատմական ժառանգությունն են, մեր ժողովրդի անցած ուղու լուռ վկաները, ինչու ոչ, նաև՝ վառ գալիքի տեսլականը: Ուստի, դրանց պահպանությունը և խնամքը, դրանց նկատմամբ հոգատարությունը յուրաքանչյուր հայի պարտքն է. չէ որ հայրենասիրությունը դրսևորվում է նաև պատմական կոթողները խնամելով ու չաղտոտելով:
Հայրենիքը սիրելու համար նախ պետք է ճանաչել: Հետևաբար, պահպանելուց բացի պետք է նաև ճանաչենք մեր հուշարձանները՝ դրանք ժառանգելով ապագա սերունդներին՝ նրանց մեջ սերմանելով սեր առ հայրենիք: Մեր պատմամշակութային կոթողներն արտացոլում են մեր դարավոր պատմությունը, հային ու հայկականը՝ հանդես գալով նաև միջազգային հարթակներում:
Պահպանե՛նք մեր հուշարձանները, ճանաչե՛նք դրանք և ժառանգե՛նք ապագա սերունդներին:
