«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրենությունը և ՊՄՊ Կոտայքի մարզային ծառայության պատասխանատուներն այսօր հյուրընկալվել էին Կոտայքի մարզի Աբովյանի թիվ 2 հիմնական դպրոցում: Կրթօջախը և մարզային ծառայությունն ակտիվ համագործակցում են, համատեղ միջոցառումներ իրականացնում: Դպրոցի աշակերտներն ու մանկավարժները մասնակցում են հուշարձանների տարածքներում սանիտարական մաքրման ու բարեկարգման աշխատանքներին:
Այս գործակցության համատեքստում էլ «Միջնադարյան Հայաստանի ճարտարապետական ժառանգություն» խորագրով կրթական ծրագրի մեկնարկն սկսվեց 1200 աշակերտ ունեցող դպրոցից:
«Պահպանության ծառայություն» ՊՈԱԿ-ի տնօրենի` գիտական աշխատանքների գծով տեղակալ Կարեն Փահլևանյանը, ողջունելով բարձր դասարանների աշակերտներին, մանկավարժներին, նշել է, որ նման միջոցառումները մատաղ սերնդի կրթական դաստիարակության հարցում կարևոր տեղ են զբաղեցնում: Մեր մշակութային ժառանգության ճանաչումը, դրանց նկատմամբ հոգատար վերաբերմունքը բոլորիս պարտքն է, ասել է նա, հավելելով, որ ՊՈԱԿ-ը նախատեսում է նման միջոցառումներ անցկացնել նաև մյուս մարզերի դպրոցներում:
ՊՈԱԿ-ի մշակութային արժեքների հանրահռչակման, օգտագործման և մարքեթինգի բաժնի ավագ գիտաշխատող Սերոբ Հունանյանը համառոտ ներկայացրել է ՊՈԱԿ-ի մասնաճյուղ արգելոց-թանգարանները, խոսել դրանց տարածքում գտնվող պատմական հուշարձանների նշանակության մասին:
Լուսապատկերային ցուցադրությամբ դպրոցականներին բավականին հետաքրքիր տեղեկություններ է փոխանցել ՊՈԱԿ-ի գիտնական-քարտուղար Աշոտ Փիլիպոսյանը: Միջնադարյան հայկական եկեղեցիները նա ներկայացրել է փաստագրական տվյալներով, խոսել դրանց ճարտարապետական արժեքի, պատմական նշանակության մասին, մեջբերել ավանդապատումներ:
ՊՄՊ Կոտայքի մարզային ծառայության պետ Կամո Հակոբյանն էլ անդրադարձել է մարզի հուշարձանների պահպանությանը, մարզային ծառայության աշխատանքին, հուշարձանների նկատմամբ կատարվող իրավախախտումներին: Նրա խոսքով այս տարվա ընթացքում նման 5 դեպք է արձանագրվել:
Ամփոփելով միջոցառումը կրթօջախի տնօրեն Սվետլաննա Հովհաննիսյանը շնորհակալություն է հայտնել, որ հենց թիվ 2 դպրոցն է ըտնրվել այս միջոցառման համար: Նա համոզմունք է հայտնել, որ կրթամշակութային համատեղ ծրագրեր առաջիկայում ևս կիրականացվեն:
Նշենք, որ մայիսի 28-ին նախատեսվում է ՊՄՊ Կոտայքի մարզային ծառայության աշխատակիցների, կրթօջախի աշակերտների, մանկավարժների մասնակցությամբ արշավ կազմակերպել Հատիսի գագաթ:
