Մեծամորի ցուցադրության մեջ առանձնահատուկ տեղ է զբաղեցնում արգելոց-թանգարանի ոսկե իրերի հավածքածուն։ Իր յուրօրինակ գեղեցկությամբ այն մշտապես գրավել է այցելուների ուշադրությունը։
Դեկտեմբերի 15-ին «Մեծամոր» պատմահնագիտական արգելոց-թանգարանում անցկացվող գիտաժողովին զուգահեռ կբացվի Մեծամորի ոսկու՝ հատուկ զետեղարանի նոր ցուցադրությունը։
Մինչ այդ, առաջարկում ենք ծանոթանալ ցուցադրության մեջ ներկայացված որոշ գտածոների հետ:
Եգիպտա-կասսիտական չափակշռային համակարգի մեջ մեծամորցիների ներգրավված լինելու հանգամանքը փաստում է նաև դամբարանադաշտից հայտնաբերված սարդոնիքսե գորտաձև կախիկը: Գորտի արձանիկ-կախիկը կշռաքար է ծառայել, քանի որ դրա քաշը (8,64 գր.) համապատասխանում է բաբելոնյան 1 սիկղ կշռաչափին:
Եգիպտոս-Միտաննի-Կասսիտական Բաբելոն եռադաշինքի հետ մ.թ.ա. XVI-XIV դդ. Մեծամորի կառավարիչների ունեցած քաղաքական և մշակութային կապերի մասին վկայում են նաև Թութմոս III-ի և Ռամզես II-ի ժամանակներին վերաբերող եգիպտական կոյաբզեզ-դրոշմները, ինչպես նաև Կուրիգալզու I-ի և միտաննական գլանաձև կնիքները:
Մեծամորի ուշբրոնզեդարյան նյութերում առանձին մեծ խումբ են կազմում բնակավայրի տարբեր հատվածներից և դամբարաններից հայտնաբերված կենցաղային, տոնահանդեսային և ծիսական խեցեղենի ամբողջական և բեկորային նմուշները: Սրանք ներկայացված են գավաթներով, կճուճներով, քրեղաններով, թասերով, նախշազարդ և արձանազարդ սափորներով, թաղարներով, կեռնոսներով, պատվանդաններով, ծորակավոր անոթներով և այլն: Դրանց մի մասը ժամանակին օգտագործվել է Մեծամորի սրբարաններում Նոր տարվան, բնության զարթոնքին, արևի, լուսնի, հողմի ու ջրի աստվածություններին նվիրված տոնահանդեսների, նվիրագործական ծեսերի, ծննդին ու մահվանն առնչվող արարողությունների իրականացման ժամանակ:
