Ապակե սև, գնդաձև ուլունքահատիկներից կազմված այս ուլունքաշարը թվում է՝ ստեղծվել է մեր օրերում ժամանակակից կնոջ կերպարն ամբողջացնելու համար։ Այնինչ ուլունքաշարը թվագրվում է մ․թ․ա․ XI-IX դ․։
46 սմ երկարությամբ առարկան «Պահպանության ծառայություն» ՊՈԱԿ-ի Հնագիտության ֆոնդի Սարուխանի «Պալի տակ» դամբարանադաշտի հնագիտական հավաքածուից է։
Հայտնաբերվել է Գեղարքունիքի մարզի Սարուխան և Կարմիրգյուղ բնակավայրերի շրջանում և հարակից հատվածներում կատարված պեղումների արդյունքում թիվ 15 դամբարանից (պեղումների ղեկավար Ա․ Փիլիպոսյան)։