Հայաստանի առաջին հանրապետության 100-ամյակին նվիրված միջոցառումներ են տեղի ունեցել Կոտայքի մարզի մի շարք բնակավայրերում, որոնց ակտիվորեն մասնակցել են ՊՄՊ Կոտայքի մարզային ծառայության աշխատակիցները։
«Եղվարդի արվեստի դպրոց» ՀՈԱԿ-ում բացվել է «Վիշապի հետքերով» ցուցադրությունը։
Կոտայքի մարզկենտրոնում միացիալ Հայաստան երիտասարդական կազմակերպության և ՊՄՊ Կոտայքի մարզային ծառայության նախաձեռնությամբ կազմակերպվել է Հայաստանի առաջին հանրապետության պետական գործիչների լուսանկարներով երթ, որն ավարտվել է տոնական համերգով։
Լեռնանիստ համայնքում էլ բացվել է Հայաստանի առաջին հանրապետության հիմնադրման 100-ամյակին և Սարդարապատի հերոսամարտի հիշատակին նվիրված հուշաքար:
Տոնական միջոցառումները նշանավորվել են նաև հուշարձանների տարածքներում իրականացված սանիտարական մաքրման աշխատանքներով։ ՊՄՊ Կոտայքի մարզային ծառայության պետի տեղակալ Սլավա Սարգսյանի և աշխատակիցների նախաձեռնությամբ մաքրվել է Ե. Չարենցի տուն թանգարանի առջև տեղադրված գրողի կիսանդրի հուշարձանը։ Իսկ Լեռնանիստի համայնքապետարանի հետ համատեղ ուժերով մաքրվել է ԵԱԶ հուշարձանի տարածքը։
Հայաստանի առաջին հանրապետության 100-ամյակին նվիրված միջոցառումներ են անցկացվել նաև Տավուշի ու Վայոց ձորի մարզերում: Մասնավորապես Տավուշի մարզի կրթական մի շարք հաստատություններում, մ/ծ պետի տեղակալ Ռաֆիկ Մուրադյանը հանդես է եկել Ավարայրի ճակատամարտին, արցախյան ազատագրական պայքարին առնչվող զեկուցումներով:
Վայոց ձորի մարզի դպրոցականների համար էլ Սարդարապատի հերոսամարտին նվիրված բաց դաս է անցկացվել «Արփի» բնապատմական արգելոցում : «Գլաձորի համալսարան» պատմամշակութային արգելոց-թանգարանում տեղի է ունեցել «Հաղթական մայիսի շարունակությունը» միջոցառում, որին ներկա են եղել Եղեգնաձորի թիվ 2 միջնակարգ դպրոցի աշակերտներն ու ուսուցիչները։ Բաց դասի ընթացքում արգելոց-թանգարանի վարիչ Բարիս Քոչարյանն անդրադարձել է 100 տարի առաջ տեղի ունեցած պատմական բախտորոշ իրադարձություններին, զուգահեռներ անցկացրել մայիսյան հաղթանակների հետ՝ դրանցից գլխավորը համարելով արցախյան ազատամարտն ու Շուշիի ազատագրումը։ Միջոցառումն ավարտվել է դպրոցականների ու արգելոց թանգարանի վարիչի միջև ակտիվ հարց ու պատասխանով։
