«ԳԱՌՆԻ»-ՈՒՄ ՆՇԵԼ ԵՆ ՓՈՔՐԻԿՆԵՐԻ ՏՈՆԸ

«ԳԱՌՆԻ»-ՈՒՄ ՆՇԵԼ ԵՆ ՓՈՔՐԻԿՆԵՐԻ ՏՈՆԸ

Երեխաների պաշտպանության միջազգային օրը՝ հունիսի 1-ին հեքիաթային ու տոնական էր «Գառնի» պատմամշակութային արգելոց-թանգարանում: Մանկական գեղեցիկ ու հոգեթով երգերի հնչյունների ներքո պարում և ուրախանում էին օրվա հերոսները:

Թեև միջոցառումը նախատեսված էր օրվա երկրորդ կեսին, սակայն, առավոտից արգելոց-թանգարանը մարդաշատ էր՝ աշխույժ այցելուներով: Նրանցից շատերը իրենց փոքրիկ աչուկներով՝ զարմացած ու հետաքրքրությամբ նայում էին հեթանոսական տաճարին՝ ասես հասկանալով, որ հուշարձանի տարածքում իրենք սովորական այցելու չեն, այլ՝ տանտեր:

Երկու ժամից ավելի տեւած միջոցառում-համերգը հանդիսականներին տեղափոխել էր մանկական երազանքների հեքիաթային ու գունագեղ աշխարհ:

Սոֆի Դևոյանի մշակույթի կենտրոնի  պարային խմբերը՝ «Արասո»,  «Արտմե» և «Արմելադ», պարային խմբերը, ինչպես նաև՝ Զարուհի Բաբայանի երգի ստուդիայի սաները իրենց պրոֆեսիոնալ կատարումներով հիացրել էին ներկաներին:

Միջոցառման բացման պատիվը տրվել էր «Հայաստան» մարզական հասարակական կազմակերպության Երևանի սուսերամարտի մասնագիտացված մարզադպրոցի սաներին:

Մանուկների օրը «Գառնի»-ում նաև հարսանեկան գեղեցիկ ֆոտոշարք ունենալու  առիթ էր: Ամուսնական զույգը հեթանոսական տաճարի ֆոնին նկարվելուց հետո, «անցել» է նաև՝ սուսերամարտիկների կազմած կամարի տակով:

Երգ, պար ու հեքիաթների ամենատարբեր ու բարի հերոսների հետ խաղեր: Միջոցառումը եզրափակել են հեքիաթների հերոսները՝ հեքիաթային հետաքրքիր աշխարհում նորից հանդիպելու ակնկալիքով:

Լավագույն ու սպասված անակնկալն էլ վերջում էր՝ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրինությունը անակնկալ էր պատրաստել: Երեխաները Գառնիից հեռացել են քաղցրավենիքներով: